Isang hakbang palapit ang akin,
Isang hakbang palayo ang sa'yo.
Saan mo itinapon ang pag-ibig?
Baka maaaring pulutin ko.
Isang halik ng luha sa hatinggabi,
Isang hikbi sa bawat yumaong silakbo.
Isang heleng 'di aabot sa iyong pandinig
Sa mga oras na nangingibabaw ang pagkabigo.
Isang haplos sa pagkahinawa
Isang hilagyong pinawian ng dagitab
Halakhak sa bawat nagkukunwaring
Panlunas sa nagkukubli pang lagablab.
Isang hikab ng pusong pagal,
Isang hiwa sa kirot ng bawat paalam.
Saan mo itinapon ang pag-ibig?
Saan mo ba itinapon...
Walang komento:
Mag-post ng isang Komento